ازاي أقيَم شغلي صح؟
Dec Sat, 2020
Admin Account
6914

 

 

ازاي تحسب القيمة الصح لشغلك والمعدّل بالساعة؟

 

فريلانسرز كتير سواء مبتدئين أو بقالهم فترة طويلة في المجال بتواجههم مشكلة تسعير خدماتهم خاصة لو مطلوب منهم تسعير شغلهم بالساعة، واحنا هنحاول نساعدك تحسب المعدل المناسب بالساعة، وعشان تعرف تعمل دا محتاج تفهم حاجتين، أولاً ايه القيمة اللي بتعرضها وبتقدّمها للسوق، وايه الراتب السنوي اللي يناسب القيمة دي والمصاريف السنوية اللي هتحتاج توفّرها عشان تقوم بوظيفتك بشكل فعّال؟

 

نبدأ بمحور القيمة المضافة، عشان تقدر تحسب قيمتك السوقية -نسبةً إلى السوق- وعلى أساسها تحسب قيمة شغلك، محتاج تعرف مقارنة بكل المنافسين ليك في المجال، انت موقعك ايه؟ ودي بيحددها، خبراتك، مهاراتك، متوسط الأجر للي في مستواك وبيشتغل Full-time؛ فلو انت مثلاً كنت بتشتغل في شركة وبتاخد مرتب معيّن وشايف إنّه المناسب لقيمتك السوقية يبقى دا هيبقى المرجعية المناسبة ليك، وكل ما شغلك بيتطوّر أو بيبقى فعّال أكتر، القيمة السوقية ليك بتزيد. لازم تاخد بالك لو انت خبرتك كبيرة وعندك من المهارات اللي يخليك تعمل الشغل في مدة أقل، دا مش معناه إنك تاخد فلوس أقل بل بالعكس لو بتعمل الشغل في نص الوقت، انت بتاخد قيمة مهاراتك وخبرتك وبيضاعف سعر المعدل بالساعة بتاعك.

 

نناقش المحور التاني للحسبة وهو التكلفة السنوية المصاحبة لشغلك، ودي بتشمل حاجات كتير زي تأمين صحي، ضرايب على الدخل، تكلفة استهلاك للكمبيوتر والموبايل اللي هتغيّرهم بمعدّل دوري عشان الشغل، تكلفة استخدام البرامج واشتراكات المواقع اللي بتستخدمها وبتساعدك في شغلك، فواتير الكهرباء والانترنت، وإيجار المكتب أو اشتراك الcoworking space اللي هتشتغل منه؛ كل التكاليف دي بتزودها على بعضها وتحسبها سنويّاً هتكلّفك كام وتجمعها مع الراتب السنوي المناسب لقيمتك ويبقى دا الرقم الكامل اللي مطلوب منك تغطيه لو هتشتغل فريلانسر بس.

 لومش عارف تحسب الراتب المناسب لخبرتك تقدر تعرف متوسط الرواتب لتخصصك من خلال اللينكات دي

https://bit.ly/3aL9F9x

https://bit.ly/3nRC8OU

 

من هنا الحسبة هتبقى بسيطة، بتتخيّل إنه عدد ساعات الشغل في السنة بدون الجمعة والسبت ٢٠٨٠ ساعة سنوياً، ولو هتاخد أجازات كمان قول شهر يعني ١٧٦ ساعة يبقى متبقي حوالي ١٩٠٠ ساعة، بتضيّع على الأقل ربعهم في الرد على الميلات، والقهوة وغيره فبيتبقى ما يقارب ١٤٠٠ ساعة، بتقسم الرقم بتاع الراتب السنوي والتكاليف السنوية على ال١٤٠٠ ساعة، والناتج من المفترض بيحدّد لك المعدل بالساعة لشغلك.

 

بس كدا، هي دي الحسبة بكل بساطة، ولو عندك أي استفسارات تانية، تقدر تكلمنا على الفيسبوك أو تبعت لنا على الايميل دا:

 info@freelanceyard.com